ហេតុផល១០យ៉ាងដែលធ្វើជំនួញតូចៗត្រូវបរាជ័យ
ការបង្កើតជំនួញគឺជារឿងដ៏ស្មុគស្មាញ ប៉ុន្តែមិនមែនមានន័យថា លោកអ្នកមិនអាចធ្វើវាបានសម្រេចនោះឡើយ។ ការស្វែងយល់ឱ្យបានល្អិតល្អន់នូវចំណុចខ្វះខាតរបស់អ្នក និងចំណុចខ្សោយរបស់ស្ថាប័នផ្សេងៗ នឹងអាចជួយឱ្យលោកអ្នកទទួលបានភាពជោគជ័យយ៉ាងប្រសើរ។
ខាងក្រោមនេះ គឺជាហេតុផលខ្លះដែលធ្វើឱ្យជំនួញខ្នាតតូចរបស់លោកអ្នកទទួលបរាជ័យ៖
១. ខ្វះការផ្ដោតលើគោលដៅ
ក្នុងការធ្វើជំនួញ វាជាកំហុសដ៏ធំមួយពេលដែលលោកអ្នកមិនមានគោលដៅ និងពេលវេលាកំណត់ច្បាស់លាស់។ មនុស្សច្រើនណាស់ដែលមិនបានយល់អំពីរឿងនេះ ហើយកំណត់គោលដៅយ៉ាងច្រើនក្នុងពេលតែមួយ។
២. សម្រេចចិត្តមិនបានល្អ
ជំនួញទទួលបានជោគជ័យក៏ព្រោះតែមានការសម្រេចចិត្តដ៏ឆ្លាតវៃ។ ហើយជារឿងធម្មតា ដើម្បីធ្វើការសម្រេចចិត្តឱ្យបានល្អ លោកអ្នកត្រូវតែទទួលបានព័ត៌មានគ្រប់ជ្រុងជ្រោយ មុននឹងធ្វើការសម្រេចចិត្ត ជាជាងការសម្រេចចិត្តដោយគ្មានទិន្នន័យគ្រប់គ្រាន់។
៣. ខ្វះសមត្ថភាពបត់បែនតាមការផ្លាស់ប្ដូរ
ការផ្លាស់ប្ដូរកើតឡើងជាដរាប ជាពិសេសគឺនៅក្នុងសម័យបច្ចេកវិទ្យាដ៏ទំនើបនេះ ដែលការផ្លាស់ប្ដូរកើតឡើងស្ទើរតែគ្រប់វិនាទី។ ដើម្បីរស់រានបាន ជំនួញរបស់លោកអ្នកត្រូវតែមានកម្លាំងខ្លាំង ហើយអាចបត់បែនទៅតាមស្ថានការណ៍បានយ៉ាងល្អ។
៤. ប្រើប្រាស់របៀបដឹកនាំទន់ខ្សោយ
អ្នកអាចជាមនុស្សដែលមានចិត្តសប្បុរស ប៉ុន្តែត្រូវចងចាំថា បើសិនជាលោកអ្នកមិនអាចឱ្យអ្នកដទៃធ្វើកិច្ចការដ៏លំបាកទេនោះ ពួកគេមិនមានការរីកចម្រើនឡើយ ហើយអ្នកក៏គ្មានលទ្ធផលល្អផងដែរ។
៥. មានការប្រកួតប្រជែងដ៏ស្រួចស្រាវ
ការប្រកួតប្រជែងគឺជារឿងដ៏ប្រាកដមិនអាចប្រកែកបានមួយនៅក្នុងវិស័យជំនួញ។ ប៉ុន្តែពេលខ្លះការប្រកួតប្រជែងនោះវាមានលក្ខណៈស្រួចស្រាវពេក រហូតដល់លោកអ្នកត្រូវបង្ខំចិត្តបិទជំនួញរបស់លោកអ្នកតែម្ដង។ ប្រការដ៏ល្អ លោកអ្នកមិនត្រូវភ័យខ្លាចទេ ផ្ទុយទៅវិញលោកអ្នកត្រូវប្រឈមនឹងវាឱ្យបានល្អ។
៦. ស្ថិតក្នុងទីតាំងមិនសមស្រប
ទីតាំងគឺជារឿងសំខាន់មួយទៀតផងដែរ។ លោកអ្នកត្រូវជ្រើសរើសទីតាំងណាដែលមិនសូវមានការប្រកួតប្រជែង បើមិនដូច្នេះទេ ជំនួញរបស់លោកអ្នកមុខជាផុយស្រួយមិនខាន។
៧. ខ្វះជំនាញដែលចាំបាច់
ដើម្បីទទួលបានជោគជ័យ ធនធានបុគ្គលិកដែលមានជំនាញពិតប្រាកដ និងអាចបំពេញបេសកកម្មរបស់អ្នកប្រកបដោយប្រសិទ្ធភាពនោះគឺជាកត្តាមួយដ៏សំខាន់។ លោក Warren Buffet បានលើកឡើងថា ហានិភ័យកើតឡើងពីការដែលមិនដឹងថាអ្នកកំពុងតែធ្វើអ្វី។
៨. ចាត់ចែងភារកិច្ចមិនបានល្អ
ទោះលោកអ្នកជាចៅហ្វាយនាយ ឬអ្នកគ្រប់គ្រងក៏ដោយ ក៏លោកអ្នកមិនត្រូវច្បាមរាល់កិច្ចការទាំងអស់មកដាក់នឹងខ្លួននោះឡើយ។ លោកអ្នកត្រូវផ្ដោតតែទៅលើអ្វីដែលលោកអ្នកអាចធ្វើបាន ហើយកិច្ចការដែលនៅសេសសល់ គួរតែចាត់ចែងបន្តឱ្យអ្នកដទៃផ្សេងៗទៀតធ្វើ ហើយឱ្យពួកគេទទួលខុសត្រូវ និងផ្ដល់ការលើកទឹកចិត្តពេលពួកគេធ្វើបានសម្រេច។
៩. ខ្វះដើមទុនគ្រប់គ្រាន់
ហេតុផលមួយដែលអ្នកជំនួញតែងតែស្វែងរកជំនួញពីអ្នកវិនិយោគ និងអ្នកចូលហ៊ុននោះ គឺបញ្ហាខ្វះដើមទុនគ្រប់គ្រាន់ក្នុងការបន្ត។ បើសិនជាលោកអ្នកជួបបញ្ហានេះមែន លោកអ្នកនឹងមានផលលំបាកជាខ្លាំងក្នុងការធ្វើឱ្យជំនួញរបស់លោកអ្នករីកចម្រើន។
១០. ការបង្វិលសាច់ប្រាក់មិនបានល្អ
ការបង្វិលសាច់ប្រាក់មិនបានល្អចង់សំដៅដល់ការសងត្រលប់របស់អតិថិជនរបស់អ្នកមិនបាន ដូចអ្វីដែលអ្នកគ្រោងទុក។ នេះគឺជាបញ្ហាដ៏ធំណាស់ ព្រោះបើសាច់ប្រាក់វិលមិនទាន់ មានន័យថាខ្វះដើមទុនក្នុងការបន្តជាមិនខាន។
No comments:
Post a Comment