ស្របពេលដែលកំណើនតម្លៃដីស្ទើរគ្រប់ទីកន្លែងក្នុងប្រទេសកម្ពុជា កំពុងហក់ឡើងយ៉ាងខ្លាំងពីមួយថ្ងៃទៅមួយថ្ងៃ យើងសង្កេតឃើញថា មានមនុស្សមិនតិចទេ ដែលបានចាប់អារម្មណ៍វិនិយោគ និងប្រកបរបបក្នុងអាជីពនេះ តាមរយៈការរៀនធ្វើជាអ្នកជំនាញខាងអចលនទ្រព្យ ពីការបណ្ដុះបណ្ដាលផ្សេងៗពីក្រៅប្រទេស ឬក៏រៀនតៗគ្នា ពីក្រុមហ៊ុនជំនាញមួយចំនួនក្នុងស្រុក ដើម្បីចាប់យកឱកាសកើបលុយ។
ចង់ដឹងថា ដើម្បីក្លាយជាអ្នកវាយតម្លៃអចលនទ្រព្យ តើអ្នកគួរសិក្សាជំនាញ និងលក្ខណៈសម្បត្តិណាខ្លះ? លោក ច្រឹក សុខលីម នាយករងនៃក្រុមហ៊ុន Vtrust property នឹងរៀបរាប់ចំណុចសំខាន់ៗត្រួសៗដូចខាងក្រោម៖
ត្រូវមានចំណេះដឹងហិរញ្ញវត្ថុ ពោលគឺ យ៉ាងហោចណាស់ អ្នកដែលចង់ក្លាយជាអ្នកវាយតម្លៃអចលនទ្រព្យ គួរតែបានបញ្ចប់បរិញ្ញបត្រផ្នែកគណនេយ្យ ឬក៏ផ្នែកគ្រប់គ្រង់ ដើម្បីសម្រួលដល់ការយល់ដឹង ឲ្យកាន់តែស៊ីជម្រៅទៅនឹងវិស័យនេះ។
គោលការណ៍ផ្លូវច្បាប់ ពោលគឺថ្វីត្បិតតែអ្នកជាអ្នកប្រកបរបបខាងអចលនទ្រព្យ ប៉ុន្តែអ្នកក៏គួរស្វែងយល់ឲ្យបានខ្លះៗដែរ នូវច្បាប់ទម្លាប់ ជាពិសេសគឺ ច្បាប់នៃការសាងសង ព្រោះជៀសមិនផុតការទិញលក់ ដាច់ខាតត្រូវតែស្ថិតក្រោមច្បាប់ដែលបានកំណត់។
មូលដ្ឋានបច្ចេកទេស ពោលគឺ បើចង់ក្លាយជាអ្នកវាយតម្លៃអចលនទ្រព្យជំនាញមួយរូប ការយល់ដឹងពីផ្នែកបច្ចេកទេស គឺជារឿងសំខាន់ ព្រោះវាជាកត្តារួមផ្សំគ្នាដែលអ្នកគួរមាន។
លោកបន្តថា ក្រៅពីចំណុចត្រួសៗខាងលើ អ្នកដែលចង់ក្លាយជាអ្នកវាយតម្លៃអចលនទ្រព្យ ដាច់ខាត ត្រូវតែឆ្លងកាត់ការបណ្ដុះបណ្ដាជាមួយអ្នកជំនាញមិនថា នៅក្នុងស្រុក ឬក្រៅប្រទេស ។ ដោយការបណ្ដុះបណ្ដារយៈពេលខ្លីៗនោះ នឹងបង្ហាត់បង្ហាញអ្នកអំពី វិធីសាស្ត្រក្នុងការវាយតម្លៃ។
ដោយឡែកប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ឧកញ៉ា ចេង ខេងឆ្លាប់ផ្ដល់ការយល់ឃើញថា នៅពេលបច្ចុប្បន្ន អ្នករកស៊ីផ្នែកអចលនទ្រព្យមានចំនួនច្រើន ប៉ុន្តែសម្រាប់អ្នកដែលមានជំនាញវិជ្ជាជីវៈពិតប្រាកដពាក់ព័ន្ធទៅ នឹងផ្លូវច្បាប់ ឬវិធីសាស្ត្រក្នុងការទាក់ទាញអតិថិជន នៅមានកម្រិត។
លោកបន្តថា អ្នកប្រឡូកក្នុងវិស័យអចលនទ្រព្យ ពិតជាទទួលប្រាក់ចំណេញខ្ពស់ ប៉ុន្តែដើម្បីឱ្យជោគជ័យកាន់តែប្រសើរ ពួកគាត់ត្រូវតែអញ្ជើញមកទទួលការបណ្ដុះបណ្តាលជំនាញវិជ្ជាជីវៈ បន្ថែមទៀត លើចំណុចខ្វះខាត ហើយត្រូវរៀនសូត្រពីរៀមច្បង ដែលជាអ្នកមានបងពិសោធន៍៕
No comments:
Post a Comment