ផ្ដើមចេញពីការនិយមទិញទំនិញអនឡាញ ហើយបានមើលឃើញពីការខ្វះចន្លោះខ្លះៗ ដែលកើនមានឡើងក្នុងផ្នែកនេះ ក៏ដូចជាឃើញពីតម្រូវការច្រើនផងនោះ បានធ្វើឲ្យយុវជនខ្មែរមួយរូបដែលបានបញ្ចប់ការសិក្សាពីសហរដ្ឋអាមេរិក លោក គង់ សុលីយ៉ា សម្រេចចិត្តបោះទុនប្រមាណ៣ម៉ឺនដុល្លារ បើកក្រុមហ៊ុនមួយ ដែលផ្ដោតសំខាន់លើការដឹកជញ្ជូនទំនិញទៅឲ្យអតិថិជនគ្រប់ទីកន្លែងទាំងអស់ក្នុងរាជធានីភ្នំពេញ។
ក្រុមហ៊ុនដឹកជញ្ជូនទំនិញ ដែលមានប្រព័ន្ធគ្រប់គ្រង និងការរៀបចំមានលក្ខណៈស្ដង់ដាខ្ពស់ដំបូងគេក្នុងប្រទេសនេះ ត្រូវបានសហគ្រិនវ័យក្មេងរូបនេះ ដាក់ឈ្មោះថា ក្រុមហ៊ុនដឹកជញ្ជូនទំនិញ «Joonaak ជូនអ្នក» ដែលស្ថិតនៅតាមបណ្ដោយផ្លូវលេខ២៧១ ក្បែរស្ពានអកាសស្ទឹងមានជ័យ។
នាយកប្រតិបត្តិក្រុមហ៊ុន «Joonaak»បានឲ្យ TheBNEWS ដឹងថា « បើនិយាយពីភ្នាក់ងារដឹកជញ្ជូននៅក្នុងប្រទេសយើង ជាពិសេសនៅក្នុងរាជធានីភ្នំពេញ ដូចជាមិនមែនជារឿងអ្វីថ្មីទេ ប៉ុន្តែបើមើលពីក្រុមហ៊ុន ដែលមានរៀបចំប្រភេទនេះ ខ្ញុំគិតថា «Joonaak ជូនអ្នក» គឺជាក្រុមហ៊ុនទី១ក្នុងប្រទេសយើង ដែលបានផ្ដល់នូវសេវកម្មដឹកជញូនទំនិញរហ័សបែបនេះ»។
លោកបញ្ជាក់ថា «Joonaakជូនអ្នក» គឺជាក្រុមហ៊ុនផ្ដល់សេវាកម្មដឹកជញ្ជូនទំនិញឲ្យសហគ្រាសធុនតូច និងមធ្យមព្រមទាំង Online shop ដែលមានទីតាំងនៅក្នុងរាជធានីភ្នំពេញ។ ជូនអ្នក បច្ចុប្បន្នមានមធ្យោបាយសម្រាប់ដឹកជញ្ជូនទំនិញចំនួន១០គ្រឿង ព្រមជាមួយនិងបុគ្គលិកបម្រើការងារសុទ្ធតែជានិស្សិតផងដែរ។
«Joonaakជូនអ្នក» បានបែងចែកតំបន់ប្រតិបត្តិការរបស់ខ្លួនជាបីតំបន់ធំៗក្នុងរាជធានីភ្នំពេញ ដើម្បីងាយស្រួលកំណត់ពីតម្លៃនៃសេវាកម្ម និងពេលវេលានៃការដឹកជញ្ជូនទៅដល់ទីកន្លែង។ ដោយតម្លៃនៃការប្រើប្រាស់សេវាកម្ម«Joonaakជូនអ្នក»នេះអាចចន្លោះពី១$-១.៥$ ឯរយៈពេលអាចចន្លោះពីកន្លះម៉ោង ទៅ២ម៉ោងតាមទីតាំងជិតឬឆ្ងាយ។
បច្ចុប្បន្ន«Joonaakជូនអ្នក» បាននឹងកំពុងសហការជាមួយក្រុមហ៊ុនដៃគូចំនួន២០ក្នុងរាជធានីភ្នំពេញដើម្បីធ្វើប្រតិបតិ្តការដឹកជញ្ជូនដល់ទីកន្លែង ។ លោកបន្ថែមថា ចំនួនសហការពីក្រុមហ៊ុនទាំង២០នេះ គឺជាសញ្ញាយ៉ាងល្អសម្រាប់អាជីវកម្មរបស់លោក ព្រោះកាលពីដំបូងលោករំពឹងទុកថា នឹងប្រមូលឲ្យបានក្រុមហ៊ុនចំនួន១០សិនប៉ុណ្ណោះដើម្បីសហការក្នុងរយៈពេល១ឆ្នាំ ប៉ុន្តែអ្វីដែលហួសពីកាលរំពឹង គឺត្រឹមតែបីខែប៉ុណ្ណោះ យើងអាចទទួលបាន២០ក្រុមហ៊ុន។
No comments:
Post a Comment